Deklarata e Dritan Goxhaj si Veteran i UÇK-së Ngjall Polemika

09:28 | 27 Qershor 2026

Dritan Goxhaj, një nga protagonistët e protestave në Tiranë, ka deklaruar se akuzat ndaj tij janë ngritur me qëllim për të larguar vëmendjen nga kërkesat e protestuesve.

Në emisionin “Interaktiv” të KTV-së, Goxhaj tha se sulmet ndaj tij janë të motivuara politikisht dhe i cilësoi akuzat si të pavërteta.

Ai theksoi se nuk është prezantuar si figurë e UÇK-së gjatë protestave dhe se, sipas tij, çështja e UÇK-së nuk ka qenë pjesë e organizimit apo fjalimeve. Goxhaj shtoi se ai është veteran i UÇK-së dhe se dokumentacioni përkatës, sipas tij, gjendet në institucionet e Kosovës.

“Nga ana psikologjike njihet për manipulimin e popullit – që të merresh me individin. E unë aty nuk u prezantova as me emër e as me mbiemër, e as si ish-pjesëtar i UÇK-së. UÇK-ja s’ishte subjekt as i protestës, as i prezantimit e as i fjalimit. Nuk ishte askund. Është histori e para 30 vjetësh. Ka mbaruar, por duhej ngritur kjo histori me dokumente false… Unë jam veteran i UÇK-së. S’e kam shpallur unë, por Qeveria. Dokumentacioni ndodhet pranë zyrave të Qeverisë së Kosovës. Absolutisht (nëse ka kartelë të veteranit). Edhe certifikata, edhe të gjitha. “Gjatë operacionit ‘shigjeta’ në Pashtrik, kam qenë nën urdhrat e Bislim Zyrapit”, ka thënë ai duke shtuar se pjesë e luftës i njihet periudha mars – qershor 1999. Si veteran ka thënë se është njohur në periudhën 2018-2019″, tha ai.