Kadetët e FSK-së në qendër të vëmendjes pas operacioneve intensive në terren

16:44 | 26 Qershor 2026

Qendra për Studime Universitare e Forcës së Sigurisë së Kosovës ka përfunduar me sukses vlerësimin praktik për vitin akademik 2025/2026, të organizuar nën emrin “Qielli i Shqiponjave 2026”.

Sipas njoftimit të FSK-së, gjatë një angazhimi nëntëditor në rajonin e Gjakovës, kadetët realizuan operacione luftarake në nivel togu dhe kompanie, duke vënë në praktikë njohuritë dhe aftësitë e fituara gjatë procesit mësimor.

Vlerësimi praktik përfshiu planifikimin dhe zbatimin e operacioneve luftarake, koordinimin ndërmjet njësive dhe marrjen e vendimeve në situata dinamike, duke testuar përgatitjen profesionale të kadetëve në terren.

Sipas FSK-së, ky aktivitet kishte për qëllim zhvillimin e aftësive udhëheqëse, forcimin e disiplinës dhe bashkëpunimit ekipor, si pjesë e përgatitjes së tyre për kryerjen e detyrave në kuadër të Forcës së Sigurisë së Kosovës.